الصفر المعماري

#الصفر_المعماري

.........................

حضرتك كامساح موقع او مسؤل مساحه في بداية اي مشروع ديما بتكون المرحله الاولي عندك هي مرحلة الحفر ودي من أهم مراحل العمل في أي مشروع وأخطرها ماتقلش اهميه طبعا عن باقي المراحل لكن هي المهمه عشان هي البدايه وطبعا مش هانتكلم في المحاضره دي عن حدود الحفر هانخليها في محاضرة تانيه لكن كلامنا دالوقت عن الصفر المعماري أو الانشائي لانه نفس الصفر ونفس البدايه

اول مابنستلم اللوحات لازم ندرس قطاعات القواعد المسلحه وهي في الغالب بتكون زي الصوره المرفقه وحتي لو اختلف القطاع بس الفكره وحده وديما في القطاع بيظهر حاجه اسمها صفر مكتوب علي القطاع زي الصوره وفي حالتين لكتابة الصفر علي اللوحه اما بيكون صفر حقيقي يعني مكتوب عليه منسوبه من سطح البحر وفي الحاله دي بتكون اللوحات مريحه لانك بتكون مستلم ثوابت الموقع و x.y.z

وتقدر من ارتفاع رقبة العمود وارتفاع القاعده المسلحه وارتفاع طبقة الخرسانه العاديه تقدر تطرحهم وتحسب منسوب الحفر .

....................

لكن في حالات تانيه بتجيلك اللوحه مكتوب عليها صفر منسوب وإبعاد ودي بتتطلب منك أمر مهم جدا وهو التنسيق مع الاستشاري علي الصفر المعماري عشان بيختلف من موقع للتاني علي حسب رؤية طاقم العمل بس في الغالب في حاجتين أو تلاته مبيختلفش عليهم موقع عن التاني وهما اما بيتم الاتفاق علي منسوب الاسفلت أمام مدخل المشروع أو منسوب مطبق صرف صحي أو منسوب بلدورة رصيف امام مدخل الموقع عشان كدا القرار مش بيكون قرار المساح لوحده لازم يشترك في القرار الاستشاري ومدير الموقع وبعد مايتم اختيار صفر المشروع حضرتك بتظبط ميزانك وتاخد قراءة علي الصفر سواء غطاء المطبق أو الاسفلت أو البلدوره وتاخد عليها قراءه بالقامه ولتكن 1.40 مثلا وتدور علي اي مكان ثابت ميكونش عرضه للتكسير أو التغيير وتروح حاطط القامه عليه لحد ما تقرأ 0.40 وتروح عامل بالاسبراي مثلث محترم قاعدته فوق والراس لتحت وتكتب عليه بكل فخر 1.00+ وبكدا تكون ثبت + متر من الصفر المعماري وتروح موزع اكتر من شرب حوالين المشروع وداخل المشروع وتسلمهم للاستشاري بعد كدا بناءا علي القطاع تقدر تحسب اي منسوب عندك يعني لو اخدنا مثال زي الصوره عندك الحفر علي منسوب 1.40- من الصفر

بيكون شغلنا في الموقع كالتالي

تنصب الميزان اي وقفه وتاخد قراءة علي الشيرب الي هو 1.00+ لان دا هايكون الروبير بتاعنا

القراءه مثلا 0.75

الحسبه هتكون كالتالي

القراءه+ منسوب الروبير+ الارتفاع من علي السيكشن يدينا القراءه علي قاع الحفر الي المفروض نقراها

يعني

0.75+1.00+1.40=3.15

يعني من نفس وقفة الميزان لازم تقرا علي القامه 3.15

تحط القامه مكان الحفر وتقرا علي القامه لو قريت أقل من 3.15 يبقا عاوز تحفر

يعني مثلا لو قريت 2.90 معناها انك عاوز تحفر 0.25 سنتم والعكس لو القراءه اكبر من 3.15 يعني المنطقه دي محتاجه ردم

وطبعا وانت بتدرس اللوحات ماتنساش أن في اختلاف في ارتفاع القواعد وقاعدة الاسانسير فلازم تدرس السكاشن كويس عشان مش ديما بيكون الحفر علي منسوب واحد

الحاجه التانيه لازم وانت بتدرس الصفر المعماري مع الاستشاري لازم تاخد بالك كويس اوي ممكن يكون في اكتر من مدخل للموقع أو مداخل الجراجات ودي بتحتاج ربط ودراسه مع الاستشاري عشان تستقر علي صفر معماري يتناسب مع موقعك

وفقكم الله

#EH_Survey